Маја Андоновска со облека со која настапи на СИ-ДО пред 32 години се врати на сцена и ја отпеа „Досадна недела“

Со истите кошула и елек со кои пред 32 години настапи на сцената на СИ-ДО, Маја Андоновска-Илијевски повторно ја отпеа својата песна „Досадна недела“.

Македонската актерка со истата самодоверба од детските денови танцуваше и пееше на сцената во Центарот за култура во Битола, будејќи ги спомените кај најголемиот дел од присутните кои пораснаа со популарните детски хитови од фестивалот.

Видео

„Ќе настапам и со оригиналните Си-До алишта, поконкретно кошулата и елекот кои ги чував 32 години и сè уште ми се точни, иако сега долгиот ракав станал 3/4“ – напиша таа на Instagram пред настапот.

Оригиналната изведба

Дипломата ѝ ја врачи нејзиниот син Николај, кој исто така настапи на манифестацијата.

По повод јубилејното 30-то издание на СИ-ДО публиката имаше можност повторно да ги слушне легендарните песни кои оставија белег во детството на многумина. 

Децата кои некогаш пееја на сцената денес се возрасни луѓе, но емоцијата и магијата од песните останаа исти.

„Визба стара и гитара“, „Како ли јас да пораснам“, „Ема“, „Софи, Софија“ и многу други безвременски композиции повторно оживеаја во изведба на оригиналните изведувачи, придружувани од Оркестар DIVA.