„Кан за првпат патуваше сам без да е залепен за мама“: Ирена Лозана емотивна за првото големо патување на аутистичниот син
Фудбалерите со попреченост од ФК Карпошово се вратија со медали, пехари и незаборавни спомени од меѓународниот турнир „Champions #FootbAll“, кој изминатиот викенд се одржа во Стара Пазова, Србија.
Настанот, организиран од КМФ Мунгоси и Фудбалскиот сојуз на Србија, обедини учесници од Македонија, Србија, Босна и Херцеговина, Хрватска, Унгарија и Италија. Преку спортски активности и заедничко дружење, младите играчи испратија силна порака дека фудбалот не познава граници и навистина им припаѓа на сите.
Зад ФК Карпошово, кој е наменет за лица со Даунов синдром и лесна попреченост, стои тим од посветени професионалци кои со многу љубов и внимание работат со децата и младите, создавајќи безбедна средина во која тие се чувствуваат прифатени и сигурни.
Дека клубот нуди многу повеќе од спортски тренинзи, сведочи и искуството на Ирена Лозана, мајка на Кан, кој има аутизам. За Кан, турнирот претставуваше огромен личен успех, бидејќи за првпат отпатува сам преку граница, без својата мајка. Иако станува збор за голем чекор, Ирена вели дека не чувствувала страв, благодарение на одличната организација и професионалноста на стручниот тим, кој вклучувал лекар, дефектолог, тренер и асистент.
Во изјава за Фемина, Лозана ги сподели своите емоции за осамостојувањето на нејзиниот син:
„Кан првпат оди на ваков настан, а му е второ учество со тимот. Добро се разделивме, бидејќи тимот што беше со нив има и лекар и дефектолог и тренер и асистент. Кан беше навистина радосен што ќе оди. Јас искрено бев и радосна, ама некако како во меѓупростор... Она чувство кога нешто си замислувал дека ќе се случи, ама било толку далеку што веќе си престанал и да го мислиш. Дека детето само ќе појде некаде и ќе може да биде сигурно три дена и во хотел и на натпревар и по пат. Така што, убаво чувство во секој случај.“
Сторијата на Кан е најдобар доказ дека постоењето на клубови како Карпошово е од непроценливо значење, затоа што покажуваат дека спортот е простор за искрено пријателство, градење самодоверба и создавање еднакви можности за сите.
Даница Караташова Илиоска / Femina.mk