Хероина: Најмалото бебе родено во „Систина“ со само 610 грама го прослави првиот роденден
Рита е најмалото бебе родено во Клиничката болница „Аџибадем Систина“.
Борбеното девојче било родено во 24. гестациска недела со родилна тежина од само 610 грама, но со неверојатна желба за живот.
Рита поминала 3 месеци на Одделот за неонатална интензивна нега во болницата, каде надминала бројни здравствени предизвици карактеристични за екстремно предвремено родените бебиња. Бебенцето се соочило со незрелост на белите дробови и било на респираторна и кислородна поддршка, а во текот на лекувањето, имало и мозочно крвавење од втор степен, тешкотии со исхраната, проблеми со регулирањето на шеќерот во крвта и тешка форма на ретинопатија.
Сепак, по 96 дена интензивна грижа и борба на медицинскиот тим за нејзиниот живот, слатката хероина си заминала дома во добра здравствена состојба.
По точно една година, заедно со своите среќни родители, таа се врати уште еднаш да им се заблагодари на луѓето кои во најтешките моменти биле постојано покрај неа и нејзиното семејство.
Тимот на „Аџибадем Систина“ сподели фотографии со веселото девојче кое сега тежи околу 6 килограми и има уреден раст и развој, а според нивните зборови, не заостанува значително во однос на своите врсници родени во предвидениот термин.
