„Гушкајте ги за време на распустот, без оглед какви оценки имаат во сведителството“: Професорката Татјана Алексиќ со силна порака до родителите

Непосредно по крајот на учебната година, кога фокусот е на оценките и свидетелствата, професорката Татјана Алексиќ од гимназијата „Раде Јовчевски - Корчагин“ во Скопје сподели емотивна порака која допре до многу родители и наставници.

Алексиќ потсети дека децата најмногу ги паметат љубовта, поддршката и прегратките и дека токму тоа ги обликува како личности.

Во продолжение е нејзината објава, која вклучува и албум со семејни фотографии:

Гушкајте ги децата почесто!

Гушкајте ги за време на распустот, без оглед какви оценки имаат во свидетелството. Гушкајте ги во секој ваш слободен миг, гушкајте ги спонтано, „од заседа“, кога спијат, гушкајте ги и кога ве нервираат. Тогаш прегрнете ги најсилно, толку силно што ќе им закрцкаат коските, а вам ќе ви помине нервозата.

Гушкањето е бесплатно и ги лекува наталожените фрустрации.

Децата што растат без прегратки нема да знаат да го прегрнат животот и да  „пораснат“ во топла душа. Душата им  гладува  за топлина. Ќе палат куќи,  шуми и градови за да се стоплат,  ќе пукаат со огнено оружје и отровни зборови, обидувајќи се да ја стоплат смрзнатата душа, скаменета уште во детството.

❤️Гушкајте ги дур се мали, оти бргу ќе пораснат. Гушкањето е бесплатен депозит чуван во најсигурниот трезор - душата