Млада артистка од Србија ги користи хулахопките како платно за сликање и создава уметност која можете да ја носите на вашите нозе.
Јована Стојановиќ го користи својот талент за сликање за да создаде неповторливи дизајни на хулахопки кои ќе ја издвојат од толпата личноста којашто ги носи. Јована заедно со својата сестра Кана го создале брендот Movanas со идеја да креираат уникатен моден стил.
„Идејата е да создадеме различен и уникатен стил, во кој дури и најмалите модни додатоци, како хулахопките, ќе можат да раскажат приказна. Носењето на уметничко дело ја прави личноста забележлива и многу специјална“ – вели Кана.
Јована ја започнала својата работа сосема случајно додека се обидувала да си претстави како ќе изгледа одреден дизајн на нејзината нога. На почетокот, креативната Србинка ги разубавувала хулахопките само за себе, подоцна и за пријателките и така се раширил нејзиниот пазар.
Инспирација Стојановиќ пронаоѓа во природата, соништата и светот што ја опкружува. Сепак, процесот на сликање не е толку едноставен затоа што при определени мотиви потребно е еден слој да се исуши за да се продолжи со следниот. „Некои комплексни модели се изработуваат и со недели“ – објаснува сестра ѝ Кана.
Бојата со која Јована слика на хулахопките е водоотпорна.
