Минатата седмица се одржа еден од најгламурозните настани во светот на модата, а Париз како и секогаш беше негов домаќин. Светски познатите имиња како Chanel, Valentino, Giorgio Armani Privé и Christian Dior ги покажаа своите грандиозни колекции на Париската недела на високата мода.
За разлика од модните недели „ready-to-wear“ кои се одржуваат во Њујорк, Лондон, Милано и Париз, на кои се диктираат модните трендови за наредната сезона и се покажуваат слични бои и кројки скоро од сите дизајнери, на Париската недела на високата мода секоја колекција се карактеризира со уникатен стил.
И овој пат, само брилијантни дизајнери од рангот на John Galliano, Giorgio Armani, Elie Saab и Karl Lagerfeld имаа привилегија да ги покажат своите уметнички дела, а секоја ревија изгледаше како лабораторија на соништа.
Креациите беа феноменални, неповторливи и делуваа како да се излезени од фантазиите. Супериорните ткаенини, бои и кројки во спој со деликатната рачна изработка се покажаа како идеална комбинација за остварување на дизајнерските фантазии.
Се разбира, таквите уметнички модни дела си доаѓаат и со висока цена. Носењето на креации од високата мода е симбол на моќ и престиж, резервирано само за оние кои никогаш не посегнуваат по етикетата за да побараат цена.
Погледнете ги креациите кои ја воодушевија внимателно избраната публика, во која се најдоа и многу холивудски ѕвезди како Џесика Алба, Оливија Вајлд, Даен Кругер, Алекса Чанг, Кејт Мос, Џоди Фостер, Софија Лорен, Ева Херцигова и Ванеса Парадис.
Dior Haute Couture Spring/Summer 2011
John Galliano својата инспирација ја црпел од делата на илустраторот René Gruau, којшто имал блиска соработка со основачот на модната куќа, Christian Dior.
„50-тите години беа инспирација, но мислам дека она што го презентирав е многу, многу современо“ – изјавил 50-годишниот дизајнер.
Шоуто на Dior беше романтично, драматично и аристократско. Тоа дефинитивно се креации кои мамат воздишки.
Armani Privé Haute Couture Spring/Summer 2011
Ковчег полн со скапоцени камења беше инспирација за Giorgio Armani да ја создаде својата блескава колекција.
76-годишниот дизајнер претстави неверојатна футуристичка колекција од материјали кои блескаа на модната писта. Капите кои наликуваа на летечки чинии ја збогатија и така невообичаената колекција, а дури и обувките на моделите беа надополнети со сјајни кристали во различни бои.
Elie Saab Haute Couture Spring/Summer 2011
Колекцијата на Elie Saab беше елегантна и женствена токму како што и се очекуваше од либанскиот дизајнер.
Романтичните креации како од бајките го задржуваа погледот на секоја жена присутна во публиката. Користејќи деликатни ткаенини, Elie Saab не заборави со своите кројки да ја истакне убавината на женското тело.
Chanel Haute Couture Spring/Summer 2011
Karl Lagerfeld ја пронајде својата инспирација во сликарката Marie Laurencin, поточно во нејзините дела во периодот од 1908 до 1930 година. „Ги сакам боите од нејзините слики од тој период, со сите тие сиви нијанси и мали црни точки. Се обидов да го претставам токму тоа“ – изјавил 77-годишниот дизајнер.
Манекенките за прв пат можеа да си ги одморат стапалата, затоа што единствено на оваа ревија носеа ниски обувки. Особено забележителни беа ниските чевли без заден дел, а со триаголен преден дел, прицврстени за ногата со проѕирно ремче.
Тесните панталони во комбинација со кратка сукња и сако беа комбинација со која колекцијата се оддели од сите останати. „Вака се облекуваат младите жени денес“ – изјавил Lagerfeld објаснувајќи зошто неговата колекција се темелеше на маички, тесни панталони и ниски обувки.
Jean Paul Gaultier Haute Couture Spring/Summer 2011
Jean Paul Gaultier ја презентира својата колекција на последниот ден од Париската недела на високата мода. Инспирацијата за моќните креации тој ја црпел од англискиот панк-рок и францускиот кан-кан.
Екстравагантниот Gaultier го избра младиот модел Андреј Пејиќ за да ја презентира својата последна креација. Таквиот негов избор предизвика голем интерес од страна на медиумите.
