Актуелната колекција обувки и модни додатоци на брендот Салваторе Ферагамо изобилува со минималистички, а сепак луксузни креации.
На огромно задоволство на следбеничките на модата, познатиот италијански бренд уште еднаш ја покажа својата лојалност кон неутралните земјени бои. И кај чантите и кај обувките преовладуваат белата, црната и поугаснатите нијанси на крем, кафеава и карамела боја.
Во секој модел се вплетени едноставноста, луксузот и комфорот. Па така, во колекцијата на Ферагамо нема да видите болно високи потпетици или комплицирани модели на чанти.
Очигледно е дека комфорот и функционалноста се во основата на секој продукт, а нивната уникатност се крие во префинетите материјали и врвната изработка, кои ги прават овие модни производи достапни само за дамите со подлабок џеб.
