Светот на морските длабочини ја инспирира актуелната колекција на дизајнерката Антонија Ристовска, која беше презентирана во „Галерија 8“ во Старата скопска чаршија. Како вистинско летно модно изненадување, ревијата наиде на одлични реакции.
„Темата на колекцијата Нереиди е инспирирана од подводниот свет и водните нимфи, па на убав начин ја донесовме морската свежина на жешката калдрма во Старата скопска чаршија“ – изјави модната креаторка.
Манекенките ги претставија кратките и долгите фустани од колекцијата пролет/лето 2012 во нијанси кои ги пресликуваат боите на крајбрежните води на егзотичното Средоземно Море и неговите длабочини.
Изгледот на манекенките беше финиширан со парчиња накит од метал во корални форми. Брановидните фризури идеално го надополнија елегантниот изглед на нежните креации, наменети за дамите кои храбро пливаат во сите предизвици на денешницата и кои го движат светот напред.
Модниот настан имаше хуманитарен карактер. Собраните средства ќе бидат донирани на 1 јули, кога „Галерија 8“ го слави и својот прв роденден.
Погледнете ги и официјалните фотографии од креациите:
