Ема Вотсон сними „еко“ едиторијал за електронското списание „The Edit“. 23-годишната актерка позираше во 5 елегантни фустани кои се дел од проектот „Green Carpet Challenge“, фокусиран на популаризирањето на еколошката или т.н. одржлива мода.
Фустаните се креирани од славните дизајнери Ролан Муре, Викторија Бекам, Кристофер Бејли, Ердем и Кристофер Кејн.
Во интервјуто за списанието, филмската ѕвезда зборувала за етичката и еколошката мода, која е создадена со почит кон луѓето вклучени во производството и со почит кон еколошката средина. „Не можам да разберам зошто етичката облека е специјална, а не е основен стандард. Зошто е специјално да поседуваш нешто за кое знаеш дека не е направено во ужасни услови од 12-годишно девојче кое добива 20 пени на час?“ – рекла Вотсон.
Ова не е првпат Ема да поддржува ваков проект. Досега таа има креирано три колекции за модниот бренд People Tree, кој е член на WFTO (World Fair Trade Organisation). Fair Trade е начин на водење бизнис чија цел не е постигнување на профит по секоја цена. Тој се фокусира главно на извоз од неразвиените во развиените земји. Овој начин на трговија има за цел да им обезбеди повисоки плати на производителите и да им се помогне да се здобијат со нови знаења и да развијат нови способности за да си го подобрат животот.
Во продолжение се креациите на Муре, Бекам, Бејли, Ердем и Кејн за „Green Carpet Challenge“.
