Џорџ Клуни неретко беше нарекуван „вечниот ерген“, поради неговиот став никогаш повеќе да не застане пред олтар по првиот неуспешен брак. Но, Амал Аламудин очигледно го промени неговото мислење за бракот и стана негова свршеница.
Изминатиов викенд беше обелоденета веста за свршувачката, а списанието „People“ стигна и до првите фотографии од дијамантскиот прстен со кој Клуни ѝ предложи брак на британската адвокатка.
Парот бил фотографиран за време на вечера по повод роденденот на блискиот пријател на Клуни, Ренди Гербер, кој е сопруг на Синди Крафорд.
За време на вечерата во Санта Барбара, Амал го носела впечатливиот свршенички прстен. Станува збор за 7-каратен дијамантски прстен, кој бил дизајниран според инструкциите на 52-годишниот актер.
Според информациите до кои стигна списанието, Клуни ја побарал за жена Амал на традиционален начин, односно клекнат на едно колено. Исто така, списанието објави и дека неодамна Клуни бил во Дубаи, каде се запознал со семејството на Аламудин.
Клуни и Аламудин за првпат беа фотографирани заедно во Лондон во октомври минатата година, а потоа беа „уловени“ на романтично патување во Танзанија и Сејшелските Острови.
