Филмот ќе биде и забавен и ќе носи длабока човечка порака: На снимањето на „Денот на жената“
Гоце Цветановски ќе обработува навистина тешка и деликатна тема во својот прв филм во кој се јавува како режисер. Во трилерот „Денот на жената“ фокусот е ставен на трговијата со луѓе, присилната проституција и насилството врз жените, но како што истакнува Цветановски, главната порака е длабока и човечка.
„Првите две снимачки недели ми поминаа како миг. Не можам да го опишам чувството со зборови, можеби да го споредам со некое најслатко пијанство или прва љубов. Сега конечно го сфаќам во целост изразот ‘филмска магија’, бидејќи бев и уште сум целосно маѓепсан“ – изјави Цветановски за Femina.mk.
Гоце
„Екипата е крајно професионална, од актерите кои прецизно дестилираат широк дијапазон на емоции, до сите креативни и технички сектори. Мислам дека сме на добар пат да створиме филм кој истовремено ќе биде забавен за пошироката публика, а кој ќе носи во себе длабока човечка порака“ – додаде тој.
Снимањето на „Денот на жената“ започна на почетокот од овој месец, а освен во Скопје, ќе биде сниман и во Куманово.
Главната женска улога ја толкува талентираната Слаѓана Вујошевиќ, која се радува што е дел од толку професионaлна филмска екипа.
„Се работи многу вредно и посветено, а не ни може да се очекува друго од екипа која се состои од големи професионалци, вљубеници во филмот и луѓе кои се постојано позитивни и добро расположени! За мене, ова е еден од тие процеси во кои уживам и со нетрпение чекам снимачки ден повеќе. Сите во овој тим се одлични во својата работа и со секој од нив би сакала повторно да соработувам!“ – ни изјави Слаѓана.
Главните машки улоги им припаднаа на Муса Исуфи и Исмаил Касуми, многукратно наградувани актери од Кумановскиот театар.
Дел од актерскиот тим се и Катерина Коцевска, Елени Декидис, Егзона Салиху, Дамјан Цветановски, Осман Ахмети, Мендим Муртези и Авни Далипи.
Директор на Фотографија е Фејми Даут, кој оваа година беше номиниран за Оскар со филмот „Медена Земја“.
Официјалниот постер за „Денот на жената“
Филмот се снима со поддршка на Агенцијата за филм. Медиумски партнери на проектот се femina.mk, fakulteti.mk, skd.mk и Слободен печат.
Фото: Марко Угарковиќ и Маја Аргакијева