Емилија Мицевска во последниот триместар од бременоста со порака: Телото на трудницата не е јавен простор за коментари
Емилија Мицевска ужива во секој момент од бременоста и со нетрпение го очекува денот кога за првпат ќе го земе своето бебенце во прегратка.
Во период кога нов живот расте во нејзината утроба, македонската актерка испрати искрена и моќна порака за тоа како општеството треба да се однесува кон трудниците.
Преку емотивна објава, таа потсети дека бременоста не е време за осуди, непотребни совети и коментари за изгледот, туку период во кој на жената најмногу ѝ се потребни мир, разбирање и нежност.
Емилија сними и нежно видео со пораснатото стомаче во последниот триместар од бременоста.
Со трудница не се зборува гласно, навредливо, нападно и со бескрајни совети, како светот да знае подобро од нејзиното тело. Со трудница се зборува понежно.
Светот треба да внимава на зборовите што ѝ ги упатува на една жена во период кога таа е истовремено најсилна и најчувствителна. Да внимава да не создава дополнителен страв, вина и хаос таму каде што ѝ треба мир.
И да престанеме да мислиме дека телото на трудницата е јавен простор за коментари — дали е премногу голема, мала, здебелена, отечена или уморна. Тоа тело тивко создава живот и заслужува почит, не анализи.
Во време кога сè е маркетинг, притисок и има список од работи што ‘мора’ да ги има, забораваме дека на една трудница најмногу ѝ треба чувство на сигурност. Да не биде поправана и преоптоварувана, туку чувана.
Бременоста не е само растење на еден живот. Тоа е и тивко раѓање на една мајка.
А тој процес заслужува нежност.
Во претходно интервју за Фемина, талентираната актерка сподели дека патот до мајчинството не бил едноставен и откри дека има доживеано неколку спонтани абортуси.
„Поминав низ период кога медицинските прогнози беа скептични во однос на мојата можност да станам мајка. Зад мене стојат неколку спонтани абортуси и хируршка интервенција. Буквално ми беше кажано дека нема шанси и дека тешко ќе може да останам бремена“ – ни откри Емилија.
Среќната трудница и нејзиниот вереник Деан очекуваат синче кое ќе се вика Давид.
