Девојка која го преживеа пожарот во Кран-Монтана ги покажа изгорениците: „Момент на чист терор“

Храбра девојка, која беше меѓу повредените во пожарот во Кран-Монтана на новогодишната вечер, ги покажа изгорениците на лицето и рацете. 

Елеонора Палмиера претрпе тешки изгореници во трагедијата во швајцарскиот ноќен клуб „Le Constellation“, а изјави дека телото побрзо ќе заздрави од душата.

„Изгорениците ќе ја обележат кожата, но душата е таа што најтешко заздравува. Не смееме да дозволиме таа ноќ да ни ги дефинира животите“ – изјавила Палмиери.

29-годишната Италијанка раскажала дека само што пристигнала во клубот со своето момче Филипо, била турната внатре од луѓе кои панично бегале. Филипо успеал да излезе со толпата, но таа останала заробена внатре.

„Потоа дојде светлината – јазик од оган што неверојатно брзо се движеше кон мене. Момент на чист терор во кој сите мои сетила беа обземени од жештината“ – се присети таа.

Во пожарот згаснаа 40 млади животи, а 116 лица беа повредени. Палмиери беше една од 12-те повредени лица пренесени со хеликоптер во Милано, од каде неодамна беше пуштена на домашно лекување.

Младата жена се појави на социјалните мрежи со видео, покажувајќи го своето лице со видливи траги од изгореници. Во сега избришаното видео пишуваше:

Зад секој натпис и секој наслов во весниците стои вистински живот. Живот исполнет со страв, но пред сè со храброст и сила да се продолжи понатаму. Сакам да им се заблагодарам на оние кои никогаш не ми ја пуштија раката, на моето семејство и на мојот партнер кој остана со мене дури и во таа болничка соба.

Огромна благодарност им должам на лекарите и на целиот медицински персонал во болниците кои ме лекува со исклучителна професионалност и човечност. Ако денес сум тука и можам да раскажувам, тоа е и ваша заслуга.