„Боб за мене беше сè“: Почина Роберт Дувал, оскаровецот кој на улогите им вдахнуваше бесмртност
Веста за заминувањето на една од последните живи икони на златната ера на Холивуд одѕвонува низ светот со чувство на длабока носталгија. Роберт Дувал, актерот кој со својата супериорна појава и беспрекорен талент дефинираше цели филмски епохи, почина на 95-годишна возраст.
Тажната вест ја соопшти неговата сопруга Лусиана Дувал, која сподели фотографија и емотивна порака:
„Вчера се збогувавме со мојот сакан сопруг, скапоцен пријател и еден од најголемите актери на нашето време. Боб почина спокојно дома, опкружен со љубов и спокој.
За светот, тој беше оскаровец, режисер и извонреден раскажувач. За мене, тој едноставно беше сè. За секоја од многубројните улоги, Боб даваше сè од себе, се вложуваше целосно во ликовите и во вистината на човечкиот дух кој тие го претставуваа. Правејќи го тоа, тој ни остави на сите нешто трајно и незаборавно.
Ви благодарам за долгогодишната поддршка што му ја дававте на Боб и што ни овозможивте мир и приватност во овие моменти, за да можеме да ги прославиме спомените што ги остави зад себе.“
Од прашливите патеки на вестерните до мафијашките катчиња на Њујорк, Дувал беше синоним за актерска моќ.
Иако неговата кариера траеше седум децении, неговиот печат во култниот „Кум“ (The Godfather) останува ненадминат. Како Том Хејген, Дувал внесе елеганција и студена интелигенција која совршено му парираше на темпераментот на Марлон Брандо и Ал Пачино.
Не помалку впечатлива беше неговата улога во „Апокалипса сега“ (Apocalypse Now), а статуетката Оскар му беше доделена за маестралната глума во „Tender Mercies“ (1983).
Меѓу другите негови филмови се и „The Conversation“ (1974), „Network“ (1976), „True Confessions“ (1981), „The Natural“ (1984), „Days of Thunder“ (1990), „The Paper“ (1994), „Gone in 60 Seconds“ (2000), „Crazy Heart“ (2009), „Get Low“ (2010), „Jack Reacher“ (2012), „Widows“ (2018) и „Hustle“ (2022).
Светот денес се простува со човекот кој им вдахнуваше бесмртност на улогите кои ги играше со неизмерна страст и впечатливо присуство.
