Атрактивни близначки: Убавите внуки на принцезата Дијана во креации од Зухаир Мурад на премиера во Лондон
Европската премиера на филмот „The Devil Wears Prada 2“ собра на едно место голем број славни личности кои однесоа гламур и елеганција на црвениот тепих.
Меѓу нив беа и убавите внуки на принцезата Дијана, Амелија и Елиза Спенсер, кои се појавија на настанот во Лондон во софистицирани креации од Зухаир Мурад.
Атрактивните близначки избраа тоалети од актуелната Ready-to-Wear колекција на либанскиот моден волшебник кои совршено ги истакнаа нивните фигури.
Амелија избра елегантен црн фустан без прерамки, со скулптуриран корсет со сатенски финиш кој го нагласуваше софистицираниот стил по кој е препознатлива.
Нејзината сестра Елиза се одлучи за подеднакво впечатлив, но малку поразигран стајлинг. Таа носеше елегантен црн миди фустан со метални копчиња и контрастен бел елемент на деколтето.
На црвениот тепих, ним им се придружи и нивната сестра Лејди Кити, која шармираше во стајлинг од Долче и Габана.
Како ќерки на Ерл Спенсер, братот на принцезата Дијана, трите сестри продолжуваат да го негуваат гламурозното наследство на семејството и редовно се појавуваат на најпрестижните настани ширум светот.
