Северина го претстави вториот дел од најавената музичка трилогија. По „Nisam kriva ja“ („Bezosjećajna“), која за само неколку дена освои милионски прегледи на YouTube, хрватската пејачка денес го објави продолжението насловено „Pozovi me ti“ („Anksiozna“).
Новата песна носи сосема поинаква емоционална атмосфера од претходната. Додека „Bezosjećajna“ зборуваше за емоционалните ѕидови кои човек ги гради по разочарување, „Pozovi me ti“ навлегува во светот на несигурноста, анксиозноста и внатрешната борба.
Северина раскажува приказна за жена која беспомошно гледа како мажот кој некогаш ја повредил продолжува понатаму со истиот модел на однесување во нова врска. Љубовта, љубомората, бесот, немоќта и иронијата се испреплетуваат во стиховите, а рефренот „Anksiozna sam...“ станува најсилниот емотивен момент на песната.
Зад новиот сингл стои истиот авторски тим кој ја создаде и првата песна од трилогијата. Музиката ја компонираше Бојан Васиќ, текстот го напиша Даниел Павловиќ, а за аранжманот се заслужни Бојан Васиќ и Бранимир Михаљевиќ.
Видео
Трилогијата ќе биде заокружена со третата песна „Svirajte mi 'Rađaj sinove'“ („Savršena“), чија премиера е најавена по големиот концерт на Северина во арената во Пула.
