Актерката Емилија Мицевска ги сподели првите фотографии од синчето: „И туку-така, нашите срца станаа поисполнети“
Емилија Мицевска ги разнежни своите следбеници со првата бебешка фотосесија на синчето Давид.
На фотографиите, македонската актерка нежно го прегрнува и држи своето бебе додека тоа спие и слатко се насмевнува.
„And just like that, our hearts are fuller. 💙“ (И туку-така, нашите срца станаа поисполнети) – напиша Емилија во описот на објавата со фотографии направени од нејзиниот вереник Деан Стојковски.
Пред две недели, партнерите објавија дека станаа родители на син, а претходно, во интервју за Фемина, Емилија откри дека бебето ќе се вика Давид.
„Ќе се вика Давид. Таа тема веднаш ја решивме, и двајцата брзо се согласивме, откако го дознавме полот. За нас, Давид е љубов, верба и нов почеток“ – изјави таа.
Емилија искрено зборуваше и за тешкиот пат до мајчинството, откривајќи дека зад себе има неколку спонтани абортуси и медицински прогнози кои не биле охрабрувачки.
„Поминав низ период кога медицинските прогнози беа скептични во однос на мојата можност да станам мајка. Зад мене стојат неколку спонтани абортуси и хируршка интервенција. Буквално ми беше кажано дека нема шанси и дека тешко ќе може да останам бремена“ – ни откри Емилија.
