63 бели рози на 63 празни столчиња за 63 прекинати приказни: Кочани се сеќава на прерано згаснатите животи во „Пулс“

Денес, точно една година по кобната ноќ која засекогаш го промени ликот на Кочани и зави во црно десетици семејства, низ градот владее ненадминлива тага. Во Паркот на револуцијата, поставена е инсталација која го стега и најсилното срце.

63 празни бели столчиња стојат под отворено небо како визуелен споменик на младоста која прерано замина. Секое од нив претставува една прекината приказна, една неизживеана љубов и еден недовршен сон трагично згаснати во пожарот во дискотеката „Пулс“.

„63 бели столчиња, 63 имиња, 63 животи што недостигаат“ е пораката која силно одекнува. На секое од наредените столчиња е положена по една бела роза како моќен симбол за чистотата и невиноста на изгубените животи, а на секој наслон е испишано името на еден од загинатите. Пред овој „споменик на тагата“, отворена е и книга на жалост, во која делегациите и граѓаните можат да ги впишат своите последни поздрави кон оние чие физичко отсуство остави ненадоместлива празнина.

Родителите едногласно порачуваат:

63 бели столчиња.

63 имиња.

63 животи што засекогаш остануваат дел од нашата заедница.

Секое столче носи име, бела роза и тишина што зборува повеќе од зборови.

Празното место меѓу нив нè потсетува на празнината што остана во нашите срца.

Ова не се само столчиња.

Ова се 63 спомени, 63 приказни и 63 причини никогаш да не заборавиме.

Тивко присуство. Вечно сеќавање🕊️

Со поставувањето на оваа трогателна, симболична инсталација, утринава во 8:45 часот започна одбележувањето на годишнината од катастрофата во која животот го загубија 63 лица, а над 200 беа повредени. Настанот, кој во заедничката тага ги обедини ужалените родители, пријателите и граѓаните, е во организација на Општина Кочани и Здружението „16 март 2025 Кочани“.

Фото: Општина Кочани