Една година по трагичниот пожар во дискотеката „Пулс“ во Кочани, во кој згаснаа 63 млади животи, болката и сеќавањата не стивнуваат.
Покрај загинатите, во кобна ноќ на 16 март 2025 година беа повредени и повеќе од 200 лица, а животот засекогаш им се промени на стотици семејства.
Меѓу повредените беше и кочанчанецот Иван Стојменов, кој се здоби со тешки изгореници и беше хоспитализиран во Словенија. Таму помина 10 дена во кома и речиси еден месец водеше борба за живот.
По една година, Иван се огласи на социјалните мрежи со потресна исповед за преживеаното, за лузните, за втората шанса и за оние кои никогаш не се вратија дома. Неговата објава ја пренесуваме во целост:
Помина една година од ноќта што засекогаш ми го промени животот.
Ноќта кога во дискотеката „Пулс" избувна пожар и сé за неколку секунди се претвори во хаос, чад и страв. Ноќта кога животот и смртта беа толку блиску.
Со изгореници по рацете, лицето и дишните патишта, завршив во болница во Словенија. 10 дена кома и скоро 1 месец борба... борба за здив, за сила, за живот. Докторите велеа дека е критично.
Но, Господ имаше други планови.
Денес сум тука. Со лузни што засекогаш ќе ме потсетуваат на таа ноќ. Лузни што не се само на кожата, туку и во душата.
Таа ноќ никогаш нема да се заборави. Никогаш нема да ги заборавиме луѓето што не успеаја да излезат. Нивните животи и нивните приказни засекогаш ќе останат во нашите срца.
Оваа година ме научи нешто што многумина го забораваат — животот е кревок. Секој ден е подарок.
Секој здив е благослов.
Денес сум благодарен на Бога што сум жив. Благодарен на докторите, на моето семејство и на сите луѓе што беа покрај мене кога беше најтешко.
Животот ми даде втора шанса.
И ветувам дека ќе ја живеам така како што заслужува.
Никогаш да не се повтори!!!!! Вечна им слава на починатите.“
