Сузан Хјуз стана мајка благодарение на својата сестра која го роди нејзиниот син.
33-годишната Англичанка дознала дека е родена без матка кога имала само 16 години. Очајната тинејџерка тогаш со солзи во очите отишла кај сестра си Сара, која без двоумење ѝ ветила дека ќе направи сè за да ѝ помогне. „Ми рече дека кога ќе дојде денот и кога јас ќе сакам да имам деца, таа ќе ги носи за мене“ – изјавила Сузан.
Сузан (лево) и сестра ѝ Сара (десно)
Седумнаесет години подоцна, Сара не отстапила од своето ветување и иако имала три свои деца за кои требало да се грижи, со задоволство прифатила да стане сурогат-мајка. Сузан и нејзиниот партнер Мајк инвестирале десетици илјади долари за докторите вонтелесно да оплодат нејзини јајце клетки, со цел преку ин витро постапка Сара да остане бремена.
Првите два обиди биле неуспешни, а додека траела процедурата Сузан се чувствувала многу непријатно, бидејќи Сара имала ужасни главоболки како последица од лекарствата кои ги примала. По вториот неуспешен обид, Сузан донела одлука дека третото ин витро ќе биде и последно, бидејќи не можела повеќе да ја гледа сестра си изморена.
Сара и семејството на Сузан
Сара во ниту еден момент не се откажала и покрај своите семејни обврски. Упорноста се исплатила кога пожртвуваната сестра видела две црти на тестот за бременост и конечно можела да ја израдува сестра си. „Кога ми се јави Сара и ми кажа дека ќе станам мајка, солзи започнаа да ми течат по лицето. Тоа беше најубавиот момент во мојот живот“ – рекла Сузан.
Сузан била првата личност која го зела в раце малиот Дуги по раѓањето во ноември 2013 година. „Зборовите не се доволни да ја опишат неизмерната љубов која ја почувствував кога го зедов Дуги во прегратка. Тој беше сè за што некогаш сме сонувале и ја обожавам улогата на мајка. Толку сум среќна што го имам совршеното семејство, а тоа е благодарение на мојата поголема сестра“ – рекла Сузан. „Поголемите сестри треба да се грижат за помалите, но мојата отиде подалеку. Таа ми ги исполни сите соништа“ – додала Сузан.
Сара длабоко во себе отсекогаш била подготвена да ја одигра својата улога во раѓањето на Дуги. „Кога ме замоли во 2011 година, веднаш одговорив дека ќе го износам нејзиното бебе, без дури и да разговарам со мојот сопруг. Тоа отсекогаш беше во моите мисли и знаев дека времето ќе дојде. Не ми беше тешко да го предадам по раѓањето, зашто никогаш не го гледав Дуги како мој, јас бев само „рерна“. Сепак, ние имаме специјална врска тетка-внук“ – објаснила Сара.
