„Велигден го славиме кај моите родители, а ручекот секогаш е со јагнешко“: Бојана Скендеровски за празниците и мајчинството

„Јас сум полицаецот дома, а тато е тој што разгалува“, низ смеа признава Бојана Скендеровски кога станува збор за воспитувањето на двете деца, Искра и Ѓорѓи. Со познатата македонска пејачка разговаравме за мајчинството, за родителските стравови и радости, како и за семејните традиции.

Токму за денешниот голем празник Велигден, 42-годишната музичарка за Фемина сподели и како прославуваат во кругот на семејството и кои обичаи ги негуваат.

Дали се сеќавате на моментот кога за станавте мајка? Што се промени од тој миг за вас како личност?

Тоа се најважните моменти во мојот живот, кога сѐ се менува, ништо повеќе нема да е исто, најемотивните моменти кога стануваш и најсилна и најранлива…

Дали можеби се сеќавате на некоја анегдота или необичен момент од бременостите? Каква трудница бевте?

Бев баш расположена трудница, имав огромен стомак 😂 и возев до деветтиот месец, јадев по неколку сладоледи на ден, немав тегоби…

Како е да се расте ќерка, а како син – кои се најголемите разлики што ги чувствувате?

Многу различно, тоа се две различни психологии. Ѓорѓи и Искра се различни карактери, девојчињата се понапредни и посамостојни, Ѓорѓи е помал и сака малку повеќе внимание, не може без друштво, што и да прави.

На кого повеќе личат децата и какви се карактерно? Имаат ли талент за музика?

Мислам дека и двајцата се талентирани за музика. Искра веќе е во музичкото училиште „Илија Николовски Луј”, Ѓорѓи сѐ уште не сака како момче да признае дека треба и тој да се запише, но ќе го чекам трпеливо, не ги форсирам. Сакам самите да се пронајдат, иако дома се пее и се игра.

Која е најважната вредност што сакате да им ја пренесете на вашите деца?

Се трудам да ги воспитам во добри и праведни личности, да имаат емпатија кон светот околу себе, да бидат праведни и амбициозни.

Кој е вашиот најголем страв како мајка?

Како мајка секогаш имате милион стравови, од најбаналните - дали се доволно облечени, нахранети и сл., до тоа каква ќе биде нивната иднина, дали ќе биде сѐ во ред… мајката е за тоа.

Дали сте построг или попопустлив родител? Кој од вас двајцата е „полицаецот“ дома?

Јас сум полицаецот дома 😀 и таа којашто бара ред и дисциплина, а тато разгалува. Но, колку и да сум лута, брзо ми поминува и се завршува со гушкање.

Кој е најсмешниот или најнеочекуван момент што ви го приредиле децата?

Многу често има моменти за изненадувања, ми подаруваат цвеќиња кои тато ги купил, цртаат цртежи со посвета и слично.

Како вашето семејство го прославува Велигден? Кои традиции секогаш ги почитувате за време на празникот?

Традиционално се собираме во домот на моите родители, децата се радуваат на велигденските јајца, се бира шампион во кршење, ручекот е со традиционалното јагнешко, си разменуваме подароци и уживаме.

Дали децата учествуваат во подготовките како бојадисување јајца и подготовка на трпеза?

Да, и многу се возбудени, имаат многу идеи, креативни се и навистина се радуваат на тој чин. Секоја година создаваме различни цртежи и техники.

Дали одите во црква и дали можеби постите?

Одиме во црква во недела, а оваа година не постиме.

Ваша велигденска порака ?

Велигден, денот кој нè учи дека и невозможното е возможно, ако се верува во него. Сакајте за да бидете сакани…🙏🏻

Даница Караташова Илиоска / Femina.mk