„Трчав во паника, слушајќи ги сирените“: Снежана Лупевска Созен се присети на терористичкиот напад на 11 Септември

Пред точно 25 години, светот беше потресен од веста за нападите врз Светскиот трговски центар во Њујорк. За оние кои тој ден се нашле таму, секој 11 Септември евоцира спомени на страв и неверување.

Македонската новинарка Снежана Лупевска Созен во тој момент се наоѓала на Менхетен. Несвесна за целосните размери на трагедијата, таа трчала заедно со толпата луѓе, додека низ улиците одекнувале сирените.

Но, наместо да бара начин да побегне, Снежана во паниката размислувала како да ја пренесе информацијата до Македонија. Барала телефонска говорница за да ја извести тогашната А1 Телевизија дека во Њујорк се случил терористички напад.

Таа раскажа за страшните моменти во кратка објава на социјалните мрежи.

„25 години од нападот на World Trade Center во New York. Ден кога несвесна што се случува трчав со толпата народ на Менхетен во паника, слушајќи ги звуците на сирените, но јас трчав барајќи телефонска говорница за да известам преку тогашната А1 Телевизија дека се случил терористички напад“ - напиша таа.

„Сеќавање на жртвите, но и на оние кои со денови се обидуваа да спасат преживеани под урнатините на World Trade Center“ – дополни Лупевска Созен.

На 11 септември 2001 година, САД беа погодени од серија координирани терористички напади. Два киднапирани авиони удрија во кулите на Светскиот трговски центар во Њујорк, по што двете згради се урнаа. Трет авион удри во Пентагон, додека четвртиот се урна во Пенсилванија, откако патниците се обиделе да ја преземат контролата врз авионот. Во нападите загинаа речиси 3.000 луѓе, а настанот остави длабока трага врз САД и целиот свет.