Слаѓана Тесла беше пронајдена мртва во нејзиниот стан во Нов Белград.
Поранешната манекенка имаше 53 години, а покрај нејзината успешна модна кариера, јавноста ја памети и по приказната за роднинската поврзаност со еден од најголемите научници во историјата – Никола Тесла.
Според неофицијалните информации објавени во српските медиуми, Слаѓана живеела сама, а соседите ја немале видено неколку дена. Откако од нејзиниот стан почнал да се шири непријатен мирис, биле известени надлежните служби, кои го пронашле нејзиното тело.
Точната причина и времето на смртта треба да бидат утврдени со обдукција и истрага.
Слаѓана беше едно од препознатливите лица на српската модна сцена. Започнала да се занимава со манекенство во 1991 година, а со природната убавина, харизмата и впечатливото лице брзо го привлекла вниманието на модниот свет.
Во текот на кариерата соработувала со познати домашни и странски креатори, меѓу кои и Диор, Валентино и Вивиен Вествуд.
По успешните години на модните писти, продолжила да работи во индустријата како модна кореографка, кастинг-директорка и продуцентка, а повремено се враќала и пред камерите.
Една од најинтересните приказни поврзани со Слаѓана беше нејзината семејна врска со славниот научник Никола Тесла. Таа со гордост зборуваше за своето презиме и тврдеше дека се далечни роднини. Во интервјуа објаснуваше дека луѓе кои се занимаваат со истражување на семејното стебло на Тесла ја контактирале откако го виделе нејзиното интервју и дека во истражувањата била пронајдена таква линија.
Слаѓана верувала дека со познатиот научник ја поврзуваат и одредени физички карактеристики, како издолженото лице, изразените јагодични коски и продорниот поглед.
„Сите веднаш те запаметуваат и веднаш реагираат на презимето. Тоа понекогаш беше и лошо, бидејќи не можев да избегам од час, а тоа веднаш ќе се забележеше во училиштето. Од друга страна, горда сум на тоа презиме, многу ми значи и ми годи“ – имаше изјавено таа.
Иако природните науки не ѝ биле омилени во училиште, со текот на годините започнала да се интересира за метафизиката, енергијата и природните закони.
„Од физика дури ми подаруваа оценки, бидејќи било срамота еден Тесла да има лоша оценка по физика. Дури сега сфаќам што правел и како работел. Колку повеќе читам за него, толку повеќе го разбирам“ – изјавила таа.
