Седи на штанд за кокос, се дружи со локалците: Ријана ужива со децата на родниот Барбадос

Ријана се врати на местото кое секогаш ќе го нарекува свој дом.

38-годишната музичка ѕвезда престојува на родниот Барбадос со своите деца, а дел од семејните моменти беа уловени од папараците.

Во лежерно издание, Ријана беше фотографирана додека со малечките застана покрај локален штанд со кокоси. Пејачката им порача свежи кокоси на синчето и на ќеркичката, а фотографиите ја доловија нејзината насмевка додека ги гледаше како уживаат во тропското освежување.

Иако е една од најпрепознатливите музички ѕвезди во светот, Ријана не се обиде да го избегне вниманието на локалните жители. Напротив, расположено застана за фотографии со нив и со широка насмевка позираше пред камерите.

Посетата е уште една можност пејачката да им го доближи на своите деца островот на кој порасна и културата која е важен дел од нејзиниот идентитет.

Ријана е родена во Сент Мајкл, Барбадос, а порасна во Бриџтаун пред како тинејџерка да замине во САД и да ја започне музичката кариера која ја претвори во глобална ѕвезда.