Анџелина Џоли и Бред Пит официјално станаа сопруг и сопруга. Интимната церемонија се одржа на 23 август во замокот Миравал, семејниот имот на славниот пар во Франција.
Првите фотографии и детали од венчавката беа објавени од списанијата „People“ и „Hello!“.
За свечениот ден Џоли избра креација од модната куќа Версаче. Нежниот фустан е уникатен и неповторлив, бидејќи ја одразува креативноста на децата на Џоли и Пит. Врз него, исто како и врз велот, биле сошиени десетици цртежи од рацете на Медокс, Пакс, Захара, Вивиен, Шајло и Нокс.
Луиџи Маси од Версаче бил задолжен за забавната венчаница. „Луиџи е како дел од семејството за мене и не можев да си замислам некој друг да го прави фустанот. Тој ги познава и се грижи за децата“ – изјавила среќната невеста.
Џоли зачекорила кон олтарот заедно со двете највозрасни деца – Медокс и Пакс. Захара и Вивиен фрлале цветови собрани од градината, додека Шајло и Нокс ги носеле бурмите. Свадбената торта била дело на Пакс.
Пит носел свој костум кој не го купил специјално за венчавката, а вратоврската ја позајмил од своите деца, затоа што заборавил да си спакува своја.
„Беше многу важно за нас тој ден да биде релаксиран и исполнет со смеа“ – изјавиле младенците.
