„Прекрасен јазик имате“: Сержи од Барселона сам научил македонски, доби пофалби дека зборува подобро од многу Македонци

Млад дечко од Барселона забрзано изнудува комплименти, затоа што ни одржува лекција како се почитува македонскиот јазик.

Првпат се сретнал со нашиот јазик за време на Евровизија, кога настапот на Калиопи со „Црно и бело“ во него разбудил неверојатна љубопитност која подоцна прераснала во вистински подвиг.

Сержи посветил шест години на совладување на нашата граматика, азбука и изговор. Во видеото кое ги освои симпатиите на јавноста, тој со восхит зборува за својата поврзаност со Македонија:

„Здраво, јас сум Сержи, студент од Барселона кој учи македонски. Почнав пред 6 години, без учител, само со учебник за самостојно учење. Морам да кажам дека се заљубив во Македонија, во вашата култура, а особено во вашиот јазик.

Многу ми се допаѓа како звучи така ритмично, но елегантно. Прекрасен јазик имате и богата литература“.

Видео

Коментарите на видеото се полни со пофалби и многумина се согласуваат дека Сержи зборува подобро од многу Македонци.

Видеото го објавија од „Зборци“, здружение кое има за цел да создава и промовира нови зборови во македонскиот јазик. Во нивната порака стои:

Светот на јазикот е неверојатен. Некогаш не сме свесни до каде одекнуваат нашите дела и како тие менуваат, инспирираат и наоѓаат начини да делуваат во други светови.

Таква е приказната на Сержи. Тој е Каталонец. Првпат се среќава со македонскиот јазик на Евровизија, кога ја слуша „Црно и бело“ од Калиопи. Тоа во него буди интерес и љубопитност, кои самиот ги преточува во неверојатен подвиг. Денес, шест години подоцна, зборува, пишува и чита македонски.

Ти благодариме, @rooovi_ , за инспирацијата.

Ваквите приказни ни покажуваат дека сè што досега правиме вреди и дека без размислување треба да продолжиме да ја пишуваме, зборуваме и градиме приказната на македонскиот јазик, дома, во регионот и во светот.

Бидејќи јазикот навистина не познава граници.