По 93 дена на ГАК, храбриот Дамјан роден со само 920 грама си замина дома, истиот пат го помина и братчето пред 12 години

По 93 дена поминати на ЈЗУ Универзитетска Клиника за Гинекологија и акушерство (ГАК), малиот Дамјан се избори за својот живот и си замина дома.

Храбриот борец се роди во 28. гестациска недела и тежеше само 920 грама, а сега „со прекрасни 1.950 грама и со насмевка која го грее срцето, Дамјан си замина таму каде што припаѓа — во топлата прегратка на мама Емилија, тато Трајче и неговиот бато Марио!“

Неговата борба за живот потсетува на приказната на неговото братче Марио, кој пред 12 години го поминал истиот тежок пат, роден предвреме со само 1.180 грама. 

Двајца мали борци, две големи победи и едно семејство со приказна која потсетува дека надежта и љубовта се посилни од секој предизвик.

Еве ја објавата на ГАК:

Започна како најмало зрнце надеж, а си оди дома како најголем победник!

Поминаа точно 93 дена откако во нашиот свет тивко, но со огромна желба за живот, пристигна малиот храбар борец Дамјан.

Роден во 28-та гестациска недела, со само 920 грама, Дамјан уште од првата секунда мораше да се бори со секој предизвик со кој го соочи животот. Неговиот инкубаторот беше бојно поле, а тој — најголемиот јунак што ова семејство некогаш го видело.

Денови на грижи, молитви, молчење и тивки солзи... Но, лавовското срце на Дамјан ги надмина сите пречки, ги победи сите предизвици и докажа дека чудата навистина постојат! 

Денес, со прекрасни 1950 грама и со насмевка што го грее срцето, Дамјан конечно си заминува таму каде што припаѓа — во топлата прегратка на мама Емилија, тато Трајче и неговиот бато Марио! 

А бато Марио најдобро ја знае оваа борба... Пред точно 12 години, и тој го изоде истиот тој тежок пат, роден предвреме во 30-та гестациска недела со само 1180 грама. Денес, тој е голем, силен и подготвен да го чува и да го учи својот помал брат како се победува во животот. Ова семејство едноставно има херои на кои треба да се угледаме.

Нека му е со среќа на нашиот мал борец Дамјан! Да биде жив, здрав, безгрижен и да расте опкружен со бесконечна љубов.