„Ова срце чука само за вас“: По 20 години борба со неплодност, 54-годишна жена забремени со ин витро во Битола
Дваесет години надеж, исчекување и борба за остварување на желбата за мајчинство. 54-годишна жена, која две децении се соочувала со неплодност, конечно ја дочека радосната вест дека е бремена.
Д-р Таше Трпчевски сподели видео на Instagram во кое го претстави случајот и откри дека трудницата е во рана бременост, а на ултразвучниот преглед веќе е регистрирана срцева активност на ембрионот.
„Пациентката има 54 години, 20 години се бори со неплодност. Ова ѝ е прво ин витро, кое го реализиравме во успешна бременост“ – објаснува докторот од битолската болница „Плодност“.
„Го слушате како отчукува. Ова срце на вашето идно бебенце чука само за вас“ – ѝ вели тој додека го извршува ултразвучниот преглед.
На крајот од видеото, д-р Трпчевски ѝ се заблагодарува на пациентката за довербата која му ја укажала на медицинскиот тим на „Плодност“ и ѝ посакува лесна бременост.