Не ѝ веруваа дека го сака затоа што е во инвалидска количка, сега е бремена: Хана и Шејн ќе станат родители
Со години мораа да им докажуваат на непознати луѓе дека нивната љубов е вистинска. Ја прашуваа Хана како може да биде вљубена во маж во инвалидска количка, претпоставуваа дека му е негувателка, а не сопруга и ја обвинуваа дека нивната врска е само шоу за социјалните мрежи.
Но, Хана и Шејн Бурко ги потиснаа сите тие негативности со радосна вест со која отвораат сосема ново поглавје од својата неконвенционална љубовна приказна. Имено, двојката со огромна база на следбеници го очекува своето прво дете.
Парот, познат на социјалните мрежи како Squirmy and Grubs, објави дека Хана е во 20-тата недела од бременоста и дека нивното бебе треба да пристигне во јануари.
„Пресреќни сме што можеме да објавиме дека го очекуваме нашето прво дете во јануари! Хана е во 20-тата недела од бременоста и иако досега максимално уживавме во овој посебен период во приватност, ни недостигаше да ја споделуваме радоста со вас. А имаме толку многу за споделување“ – порачаа тие.
Веста за бременоста има уште поголемо значење ако се знае низ што сè поминале двајцата. Шејн живее со спинална мускулна атрофија и користи инвалидска количка, а откако започнаа јавно да зборуваат за својата врска, тој и Хана постојано се соочуваа со предрасуди. Поради видливата разлика меѓу нивните физички способности, многумина претпоставуваа дека Хана е негова негувателка или пријателка, наместо негова партнерка.
Токму затоа, двајцата преку своите видеа отворено зборуваат за љубовта, интимноста, бракот и секојдневието, обидувајќи се да ги урнат стереотипите за врските во кои едниот партнер има попреченост.
Хана и Шејн стапија во брак во септември 2020 година, а неколку години подоцна ја започнаа битката да станат родители. Во март 2023 година споделија дека започнуваат со ин витро оплодување, но набрзо открија дека кај Шејн не се пронајдени одржливи сперматозоиди.
По неуспешните обиди, направија долга пауза, а во јануари годинава открија дека повторно решиле да се обидат да добијат дете. Сега, нивната желба се оствари.
Сепак, Хана и Шејн не заборавија колку болна може да биде ваква објава за луѓето кои сè уште се борат со неплодност.
„Откако со години безуспешно минувавме низ ин витро, премногу добро ги разбираме тешкотиите со кои се соочуваат многу луѓе додека се обидуваат да зачнат, како и чувството кога гледаат вакви објави. Нашите срца се со вас“ – порачаа тие.
SHE’S MY WIFE!
По години во кои нивната љубов беше ставана под лупа, а потоа и години исполнети со разочарувања во обидот да станат родители, Хана и Шејн сега се подготвуваат во јануари за првпат да станат мајка и татко.