Манифестацијата по повод доделувањето на Оскарите ги кани гламурот, елеганцијата и екстравагантноста во Долби Театарот во Холивуд. Костимографката и Оскаровка Џени Беван е модна бунтовничка која одлучи да се чувствува комотно за време на филмската церемонија и се појави во мошне лежерна комбинација.
Низ годините, Џени десет пати беше номинирана од Академијата за филмски уметности и науки во категоријата Најдобра костимографија, а оваа година таа ја прослави својата втора победа за дизајнот на костимите за „Mad Max: Fury Road“.
Кејт Бланшет ѝ ја предаде златната статуетка на талентираната костимографка. Во видео, снимено додека таа чекори кон сцената за да ѝ биде врачена наградата, дел од славните гости ја меркаат од глава до пети и не ѝ аплаудираат.
Видео
Беван објаснила дека и покрај тоа што е задолжена за облеката на врвни холивудски ѕвезди, таа смета дека изгледа смешно во фустан. „Што се однесува до мене, јас сум навистина дотерана. Навистина не носам фустани и апсолутно не носам штикли. Едноставно не можам да ги носам, бидејќи имам болки во грбот. Изгледам смешно во убава тоалета и ова беше во чест на Mad Max“ – изјавила Џени. „Отсекогаш сум била прилично бунтовна и анархична со својот сопствен слободен стил“ – додала таа.
Беван ја доби својата прва оскаровска статуетка во 1987 година за филмот „A Room with a View“.