Eye Cue добија бројни критики за стајлингот на Евровизија, а сега официјално добија награда за најлошо облечени на овогодишното издание на музичкиот натпревар.
Македонските претставници Марија Ивановска и Бојан Трајковски ја освоија наградата Барбара Декс, која од 1997 година им се „доделува“ на учесниците со најлош моден избор.
На големата сцена, пејачката се појави во креација во циклама боја, која наликуваше на сако закопчано наопаку, а потоа го соблече и под него носеше кратки панталони со боди со богата текстура. Марија носеше и колоритни сандали.
Бојан беше облечен во црно-бела кошула со „пукнатини“, но сепак најкоментиран на социјалните мрежи беше изгледот на Марија.
Eye Cue настапија на првата полуфинална вечер со песната „Lost and Found“, но не успеаја да се пласираат во финалето.
настапот на Eye Cue
Ова е вторпат Македонија да добие ваква награда. Првиот пат „титулата“ најлошо облечен му припадна на Мартин Вучиќ, кој нè претставуваше на Евровизија во 2005 година.
настапот на Вучиќ во 2005 година
Наградата Барбара Декс го доби името по претставничката на Белгија во 1993 година, која носеше бежов фустан кој самата го направила.
Гласањето за оваа награда е отворено по финалето на Евровизија. Гледачите гласаат онлајн и потоа се избираат најлошо облечени изведувачи.