Македонски танчари со Даунов синдром освоија златен медал на Европско првенство во Италија

Танчарите со Даунов синдром од студиото „Dancers United МK“ повторно се вратија дома со златен медал.

Македонскиот тим го освои првото место на Европското првенство во хип-хоп кое викендов се одржа во Римини, Италија.

Ова е петти медал на тимот на „Dancers United МK“ на меѓународни натпревари.

„На среќата ѝ нема крај. Нашите танчери денес си го потврдија златниот медал на Светскиот Куп во склоп на Европското првенство во Римини. Огромна благодарност до Министерство за култура, голема благодарност до родителите кои нè поддржуваат и огромна благодарност до Вики за кореографијата која не престанува да освојува. Браво дечки, како и секогаш многу сум горда на вас“ – стои во пост на Сара Кочан, позната во македонската јавност по нејзината посветеност и љубов кон танцот и сопственичка на студиото за танци Dancers United МК.

Dancers United МK е општествено одговорна компанија која посветува големи напори за развој на танцова програма за ранливи категории на луѓе и лица со посебни потреби. Во рамките на школото, во соработка дефектолози, развиена е посебната танцова програма за лица со Даунов синдром, што овозможува поголема социјална инклузија за ранливата категорија во општеството во кое живееме.

„Ние промовираме здрав живот и здрави навики и мислам дека тоа е важно за добробитот на секој човек, а важно е што започнуваме со најмалите членови ова да го развиваме од мали нозе и идејата е тие спортски навики и дисциплина да им останат и во понатамошниот живот како навика. И секако, најважно е тоа што ние сме инклузивно студио каде сите се еднакви и ги рушиме стереотипите и бариерите“ – вели Кочан.