Македонската приказна која стигна до Холивуд: Тамара Котевска во креација инспирирана од филмот „Приказната за Силјан“ на Еми наградите

Тамара Котевска нижи сè повеќе и повеќе успеси во својата кариера.

За новиот филм „Приказната за Силјан“, македонската режисерка беше номинирана во две категории на Еми наградите.

Затоа, таа не го пропушти доделувањето на престижните статуетки кое се одржа во Лос Анџелес. На црвениот тепих, Тамара пристигна во црна креација инспирирана од штрк.

Фустанот е дело на дизајнерката Тања Кокев и нејзината ќерка Клара.

„Огромно благодарам до Тања и Клара Кокев за оваа инспирација на фустан од мојот филм. Уште една прекрасна соработка позади нас и уште многу пред нас“ – напиша Котевска.

Документарниот филм „Приказната за Силјан“ беше номиниран за Special Merit in Documentary Filmmaking, категорија во која се вреднуваат документарци со особена авторска и општествена тежина, како и за Outstanding Cinematography for a Nonfiction Program, признание насочено кон визуелниот квалитет на документарната продукција.

За филм кој својата приказна ја гради далеку од холивудските студија, самата номинација претставува исклучителен успех. „Приказната за Силјан“ се најде рамо до рамо со американски продукции и успеа да привлече внимание кон една стара приказна создадена во Македонија.

Иако оваа година филмот не ја освои статуетката, патувањето до Еми сцената е успех кој останува.

„Да се имаат две номинации за наградите „Еми“ е еден од најзначајните моменти во мојата кариера и вистинска потврда за вредноста на мојот филм „Приказната за Силјан“.

Номинацијата за кинематографија и номинацијата за Special Merit, за креативната вредност и општественото влијание на нашиот филм, се огромно признание за целата екипа.

Искуството на церемонијата беше спектакуларно – момент кој ќе остане за паметење.

Самите номинации, како и можноста да бидеме таму, за мене претставуваат победа сама по себе.

Особено затоа што овој успех го споделивме со тим кој е вистинска сила сам по себе.

За уште многу вакви моменти!“ – напиша Котевска.