Комбинацијата „Ели Сааб + висока мода“ гарантира визуелен спектакл. Либанскиот креатор не ги разочара своите гости на ревијата во Париз, презентирајќи ултра раскошна колекција.
Во белешките за ревијата, Сааб објаснува дека замислил нереален свет на „паднати кралеви, поразени од бестрашно и херојско сестринство“. Воинствените кралици ги заробуваа погледите на публиката со рачно изработени фустани со стотици илјади мониста и бисери и беспрекорни везови.
Кадифе, тантела, тул, муслин... луксузните ткаенини ја потенцираат аристократската тематика. Палетата вклучува и понежни нијанси како романтична бисерна бела, бебешка сина и пастелна розова, но и повпечатливи и потемни нијанси како мастилесто сина и мрачна зелена.
Кога станува збор за накитот, моделите носеа фин златен филигран со деликатно нанесени бисери, кристали и рачно обликувани камења.
