Американскиот бренд Guess ќе ве инспирира да започнете да размислувате за модни комбинации за пролетните и летни денови со новите колекции Guess by Marciano и Guess Jeans.
За претстојната сончева сезона, линијата Marciano предлага сензуална и свежа колекција која плени со современи елементи и лелеави креации. Не е заборавена ултра модерната црно-бела комбинација, но погледот го заведуваат и неодоливите пастелни нијанси.
Дел од колекцијата црпи инспирација од Карибите и одушевува со тропски принтови и егзотични бои.
Во кампањата за новата колекција ѕвезди се Клара Алонсо и Хедер Деприст.
Колекцијата на Guess Jeans за сезоната пролет/лето 2014 става акцент на комбинациите на материјали и елементи инспирирани од рок музиката.
Присутни се стреч материјалите, а дел од јакните и модните додатоци се изработени од превртена кожа. Одлика на колекцијата е ласерски изработен вез во комбинација со светол или бел џинс, а особено забележливи се блескавите детали. Пролетните модели доаѓаат во црно-бела комбинација, додека пак кај летните се забележуваат шармантните розови и сини пастелни нијанси.
