„Имам должност да ја претставам земјата во најдобро светло“: Згодниот Октај Сејди за Фемина пред заминувањето на Mister International 2026

На само десетина дена пред заминувањето во Тајланд, Октај Сејди за Фемина ги сподели првите впечатоци и возбудата по повод изборот да ја претставува Македонија на престижниот „Mister International 2026“.

За популарниот македонски стилист, ова не е само ново професионално искуство, туку и голема чест и одговорност да застане под македонското знаме на меѓународна сцена.

„Искрено бев и сум превозбуден, затоа што не одам само како Октај Сејди, туку како Мистер Македонија и имам должност да ја претставам нашата земја во најдобро светло. Тоа ме радува. Светот ќе слушне за нас и ќе направам максимум што можам“- вели тој.

Подготовките за големото финале веќе се во полн ек. Покрај физичката форма, 29-годишниот Октај се подготвува и ментално, а во целиот процес има поддршка од својот тренер. За организацискиот дел и претставувањето на Македонија е задолжена агенцијата од Турција „Даман“, предводена од Шакир Села, кој е единствениот лиценциран за изборот на Мистер Македонија.

Иако досега публиката го препознава пред сè како стилист и фризер, ова ново искуство за него може да биде и можност за чекор понатаму на меѓународната сцена. Тој верува дека македонските таленти имаат многу што да покажат пред светот.

„Секако дека можеме да растеме и ние од Македонија. Толку сме квалитетни и со вредности, мислам дека светот има што да види од нас“ - вели Сејди.

Сепак, и покрај новото искуство во светот на модата и манекенството, една работа за него останува непроменета - љубовта кон професијата со која се занимава со години.

„Никогаш не би го заменил фризерството со ништо друго. Тоа сум јас, тоа ми е пасија. Причината што постојам е тоа. Си ја сакам професијата и клиентите“ - искрен е тој.

За Тајланд заминува на 12 септември, каде што ќе започнат активностите поврзани со изборот, додека големото финале на „Mister International 2026“ е закажано за 26 септември.

Дотогаш остануваат последните подготовки, тренинзи и вежбање на настапот, а нашиот претставник со големи очекувања и гордост ќе се обиде да ја претстави Македонија во најдобро светло пред светската публика.

Му посакуваме среќа и успешен настап на големото финале!

Даница Караташова Илиоска / Femina.mk