Германија со „Satellite“ на Лена победи на Евровизија

Младата претставничка на Германија, Лена, со песната „Satellite“ победи на 55-тото издание на изборот за песна на Евровизија. Деветнаесетгодишната пејачка доби најмногу поени од 39-те земји учеснички на овогодишниот избор кој се одржа во Осло, Норвешка.

Со 246 поени Германија убедливо застана на првото место, оставајќи ги зад себе Турција со 170 поени и Романија со 162 поени.

Вчера, публика од 18 000 гледачи во живо го проследи шоуто во „Теленор Арената“ во Осло, а повеќе од 120 милиони гледачи од 45 земји пред малите телевизиски екрани навиваа за своите фаворити.

Во финалето учествуваа 25 земји, а 20 од песните беа избрани на полуфиналните вечери кои се одржаа оваа недела.

И покрај одличниот настап на Ѓоко Танески, Македонија не успеа да обезбеди пласман во финалето.