Ели Сааб и официјално е дел од Париската модна недела. Либанскиот дизајнер на 30 септември ќе ја открие својата нова колекција за идната сезона. По тој повод, во хотелот George V во градот на светлината е поставена изложба на раскошни креации од колекцијата на Сааб висока мода есен/зима 2013.
Придушената светлина и цветните аранжмани ја збогатуваат атмосферата и го потенцираат раскошот на рачно изработените фустани. Околу 20.000 црвени и бели рози се искористени за разубавување на лобито на хотелот.
На една од фотографиите е прикажан „невестинскиот“ фустан од последната ревија на Сааб, опкружен со букети од рози.
Ели Сааб деновиве заработува многу комплименти за невестинскиот фустан на Клер Ледемахер, која изминатиов викенд се омажи за принцот Феликс од Луксембург. Кралската свадба привлече големо медиумско внимание.
Клер Ледемахер и принцот Феликс
Славниот дизајнер објави дека венчаницата била рачно везена и секој украс бил рачно шиен од вработените во неговото ателје. Креацијата била инспирирана од неговата колекција „Ода на деликатноста“.