Фантазија во бело: Невестинската модна недела – есен 2015

15 октомври 2014, 13:43

Епицентарот на новата невестинска треска е во Њујорк. Бели ревии и презентации го преплавија Големото јаболко, мамејќи воздишки со деликатна елеганција, романтика, гламур и суптилна екстраваганција.

Дамите кои планираат свадба следната година со нескротлива љубопитност ќе ѕиркаат низ новите колекции на видните дизајнери за сезоната есен 2015.

Неконвенционални бели сетови за невести кои не милуваат да го поминат големиот ден во традиционална венчаница, но и класични венчаници за припадничките на понежниот пол кои тежнеат кон безвременски изглед имаат моќ инстантно да ја убијат рамнодушноста.

Рафинирана сензуалност пленеше на цветната ревија на Рим Акра. Хармоничната комбинација од раскошни балски фустани, венчаници кои нежно ја прегрнуваат женската фигура, кристални детали и префинета чипка во улога на невестински тетоважи беше насловена „Let There Be Light“. „Романса, женственост, фантазија“ – со овие зборови Каролина Ерера ја опишала својата колекција за време на малата презентација. Оскар де ла Рента, кој ја дизајнираше венчаницата на Амал Аламудин, им понуди на своите клиентки креации кои ќе ги доближат до невестинскиот стил на привилегираната сопруга на Џорџ Клуни.

Креаторите Марк и Џејмс од Badgley Mischka го оживеаја гламурот на стариот Холивуд, додека Моник Лулие се инспирираше од балерините и си поигра со пастелни нијанси.

Разгледајте ги најдобрите креации вклучени во новата невестинска бајка.