„Децата ти се прекрасни“: Пријателите на Панчо од ДНК со емотивни пораки една година по неговата смрт

Една година без Владимир Блажев – Панчо. Времето минува, но болката од неговото заминување не стивнува кај луѓето кои го познаваа, го сакаа и со него делеа безброј спомени.

На годишнината од неговата смрт, бројни негови пријатели се потсетија на саканиот музичар, споделувајќи заеднички фотографии и емотивни посвети на социјалните мрежи.

Поранешниот кошаркар Перо Антиќ објави нивна заедничка фотографија со опис „Фалиш, џеџуле“.

Елена Ристеска со неверување објави фотографија од Панчо, на која напиша „Пане мој, зар помина година?!“

Каролина Гочева, со која беа блиски пријатели, објави фотографија, спомен од негов роденден.

Теа Трајковска сподели заедничко селфи со Панчо и стави стихови од песната „Милион денови“ на ДНК:

„Те барам, те нема кога ми требаш, правам јас сѐ, а малку е.. те барам, те нема кога ми требаш, правев јас сѐ за тебе... милион денови јас би ги заменил за една ноќ со тебе...“

Неговиот тим од „Sure Shotz“ објави фотографија од диџеј настап на Панчо познат и како Диџеј Шорти Пи и напиша: „1 година без тебе... FOREVER 🅿️!“

Таско го одбележа денот со фотографија од настап со Панчо, за кого во многу наврати има зборувано дека многу му помогнал во тешките периоди од неговиот живот.

Ана Костадиновска, која долги години беше придружен вокал на бендот, сподели колаж со фотографии со пејачот кого го нарекуваше и свој брат, па скршена од тага стави опис: „Една година без тебе“.

Посебно емотивна беше и објавата на Маја Плантар, која сподели:

„Ќе ти кажам само дека децата ТИ СЕ ПРЕКРАСНИ
Она шо го остави зад себе е за гордост
Твоја одлика, чесни, паметни, мирни, вредни
Пливај горе спокојно, не те забораваме
Ми фалиш секој ден
Како што ни остави аманет, ако утре те нема, нема да те жалиме, ќе те славиме.
Те сакам срц❤️“

Младата пејачка Мина Блажев, со која беа и роднини, на заедничка црно-бела фотографија напиша: „Ќе ми недостигаш засекогаш П“.

И Горан Папаз се потсети на својот пријател.

Популарниот пејач кој почина на 46-годишна возраст настапуваше ноќта кога избувна пожарот во дискотеката „Пулс“ и штом го забележа пламенот и чадот, на микрофонот ги советуваше сите да излезат надвор. Иако имаше информации дека неговата состојба е подобрена, за жал, тој не успеа да преживее.

Панчо беше татко на две деца - Андреја и Марјан.

Во пожарот во Кочани згаснаа животите на речиси сите членови на ДНК - пејачот Андреј Ѓорѓиески, клавијатуристот Филип Стевановски, гитаристот Александар Коларов, тапанарот Ѓорги Ѓоргиев, придружниот вокал Сара Пројковска, бит-боксерот Мартин Атанасовски (Буцо), тонецот Игор Велков и фотографот Александар Ефремов.