Зухаир Мурад континуирано продира во женските фантазии за да создаде модни дела кои инстантно освојуваат срца. Либанскиот дизајнер во Париз изненади со боемска рапсодија за дамите кои го обожаваат слободниот дух.
Шармот на 70-тите ги диктираше силуетите на колекцијата есен/зима 2017, како и модните додатоци (шеширите и дебелите колани кои ја акцентираа женската половина). Од друга страна, Мурад покажа дека не владее лежерно расположение низ софистицираната колекција, па блескавите детали и рачно изработените комплексни везови гласно говореа дека станува збор за висока мода.
Неочекуваните декорации како мотиви од Кавказ и Персија, азиска флора и фауна и шари инспирирани од уметноста на Густав Климт ја интензивираа атрактивноста на креациите.
