Ангелско деби од 50 милиони долари: Кајли Џенер за првпат на ревија на Victoria’s Secret, го носеше најскапиот градник

Кајли Џенер беше најголемото изненадување на годинешната ревија на Victoria’s Secret.

29-годишната ријалити ѕвезда за првпат зачекори на модната писта на славниот бренд и тоа во спектакуларно издание вредно неверојатни 50 милиони долари.

Со огромни бели ангелски крилја, блескаво мини здолниште и дијамантски градник, Кајли го привлече вниманието на присутните на гламурозното шоу во Лос Анџелес.

Но, највпечатлив елемент од нејзиниот стајлинг беше легендарниот Градник од фантазиите. По осум години пауза, прочуениот дијамантски градник се врати на пистата.

Зад спектакуларната креација стои луксузната куќа Jacob & Co.. Градникот е изработен целосно од 18-каратно злато и природни дијаманти, а под скапоцените камења нема ниту сантиметар ткаенина.

Составен е од 3.218 индивидуално излеани делови и украсен со вкупно 4.410 природни дијаманти. Во центарот блеска раскошен жолт дијамант од 75,54 карати и само неговата вредност се проценува на вртоглави 22 милиони долари. За создавањето на градникот биле потребни повеќе од 1.000 часа работа и вештите раце на 15 мајстори.

Со проценета вредност од 50 милиони долари, градникот е најскапиот Fantasy Bra во историјата на Victoria’s Secret. Меѓу славните убавици кои низ годините ја имале честа да го носат дијамантскиот градник се и Адријана Лима и Хајди Клум, кои го носеле по трипати.

Дебито на Кајли од публиката го следеа нејзиното момче Тимоти Шаламе и мајка ѝ Крис Џенер.