„19 години без нашиот Тоше, вечно ќе го паметиме моментот на неговата смрт“: Игор Џамбазов на годишнина од смртта на Тоше Проески
Денес се одбележува уште една годишнина од смртта на Тоше Проески, денот кога Македонија и регионот се соочија со загуба која остави неизбришлива трага.
И по 19 години, спомените за нашиот Тоше сè уште се живи, а неговото име буди исти емоции и тага како и на денот кога ја слушнавме веста за неговото заминување.
На трагедијата која засекогаш го промени животот на многумина се потсети и Игор Џамбазов, кој сподели емотивна порака за моментот кој никогаш нема да избледи од сеќавањата.
„19 години без нашиот Тоше… 💔🕊️“ - напиша тој
„Смртта на Тоше кај нас Македонците е некаков еквивалент на смртта на Џон Кенеди кај Американците. Сите оние што живееле во времето на тој можеби најпознат атентат во историјата, точно знаат каде биле во тој момент, со кого биле, што правеле, што зборувале и како реагирале на објавувањето на трагедијата.
Сите ние вечно ќе го паметиме тој момент.
И тешко дека ќе го заборавиме“ – стои во објавата на Џамбазов.
На Instagram Story, Игор сподели фотографија со една од најпознатите негови изјави за Тоше.
„Тоше почина без да умре, а ние кога ја слушнавме лошата вест, умревме без да починеме" - Игор Џамбазов.
Претходно, во подкастот на Ландов, Игор зборуваше за огромното позитивно влијание кое го имаше Тоше во регионот, а и пошироко.
Деветнаесет години подоцна, Тоше и понатаму живее преку своите песни, хуманоста и љубовта која им ја даваше на луѓето.
Времето минува, но загубата никогаш не станува помала. Неговиот глас останува дел од колективното сеќавање на Македонија.