На денот кога изминаа точно шест месеци од смртта на музичарот и клавијатурист Филип Стевановски, член на групата ДНК, неговата сопруга Ирена Крстевска Стевановска со длабока тага го дочека нејзиниот роденден.
Ден што некогаш бил исполнет со радост и изненадувања од Филип, сега за неа и малата ќерка Лора е болен потсетник на празнината што ја оставил зад себе.
Во емотивната објава на социјалните мрежи, Ирена напиша:
Денес е мојот прв роденден без тебе… Ден кој секогаш беше исполнет со радост, изненадувања и твојата љубов што знаеше да ми го направи секој миг посебен. А сега, наместо насмевки и честитки, чувствувам празнина која ништо не може да ја исполни.
Токму денес, кога требаше да славам, се навршуваат 6 месеци откако сме без тебе. Половина година без твојата насмевка, без твојот глас, без твојата топлина. Половина година во која и јас и Лора учиме да живееме со болката, но и со гордоста што те имавме во нашиот живот.
Те сакаме бескрајно.
Во моето срце и во срцето на Лора ќе живееш засекогаш.
Филип загина во ужасниот пожар во дискотеката „Пулс“ на 16 март. Вчера во Кочани се одржа „Марш за ангелите“, а на плоштадот „Македонија“ во Скопје имаше мирен собир во чест на починатите жртви.
