Пожарот во дискотеката „Пулс“ во Кочани остави трага врз многу семејства.
Дарко Златев, кој успеа да преживее, но претрпе изгореници од трет степен на рацете, раскажа за кобната ноќ и за моментот кога дознал дека неговата внука од сестра почина во трагедијата.
„Воопшто не се нервирам за моите раце што се вакви, колку што ми е криво што го изгубив моето ангелче затоа што нема нешто повеќе што сум го сакал од неа. И никогаш животот нема да ми биде ист како што ми бил досега“ – вели Дарко низ емоции.
Ова е неговата изјава во целост:
Со моите другари бевме на забава во дискотеката и седевме точно до бината од каде започна пожарот. Кога видов дека веќе се пали плафонот, почнав со мојата вода и сите другарите да гасиме. Дојде и газдата на дискотеката со ПП-апарат, почна да гаси, ама тој апарат не беше соодветен. Пејачот на бендот „ДНК“ почна да вика во тој момент: ‘Сите излегувајте еден по еден’. Тоа беше толпа на народ. Пожарот стаса толку многу, целиот плафон се запали, бев многу блиску до вратата и се заглавив на самиот излез. Снема струја, многу голем чад имаше, пискаа, викаа, сите бараа помош.
Ги ставив само така рацете да не ми изгори главата и веќе се откажав... Другиот колега вулканизер го видов како помага на луѓето и тој ме извлече надвор без патики, без алишта, од толку што беше тесно и заглавено. Дојде Брза помош, ме однесоа во кочанската болница, ми ставија инфузија.. Сестрите колку можеа помагаа, на некои не можеа и ме однесоа за Скопје. Вечерта ме испратија за Белград, имав трет степен изгореници на десната рака, имав потешкотии со дишењето. На левата рака имам трансплантации на прсти и на дланка, на десната рака имам кожа одземено од сопствените нозе. Се јавив на мојата сестра да прашам како е мојата внука и она ми кажа дека е почината. Бев во депресија, не можев да го прифатам тоа што сум го изгубил. Воопшто не се нервирам за моите раце што се вакви, колку што ми е криво што го изгубив моето ангелче затоа што нема нешто повеќе што сум го сакал од неа. И никогаш животот нема да ми биде ист како што ми бил досега.
Пожарот во „Пулс“ се случи на 16 март и ги одзеде животите на 62 млади лица.
