Негативни мисли од кои треба да се ослободите кога сте сингл

„Можеби сум премногу пребирлива“

Знаете што сакате и не се задоволувате со помалку? Нема причина да го сметате тоа за минус. Би било многу нефер кон вас ако одлучите да излегувате со секој маж кој колку-толку изгледа пристојно и со кого можете да поднесете да сте во врска. На крајот на краиштата, во таква врска нема да сте среќни и секогаш ќе мислите дека има нешто подобро за вас.

Почитувајте ги вашите критериуми. Само вие знаете што е најдобро за вас и не дозволувајте околностите или одредени личности да ве принудат да верувате дека токму поради тоа правите грешка.

„Никогаш нема да си најдам некој затоа што сум [негативен збор]“

...дебела, недоволно убава, недоволно интелигентна. Женскиот ум е креативно место кога ќе проработи самокритичноста. А, всушност, тоа е последното нешто што треба да го правите кога и да било. Секојдневно повторувајте си ги вашите доблести и позитивни страни и еднаш засекогаш ослободете се од критичките негативни мисли.

„Што не е во ред со мојот изглед? Не сум доволно секси?“

Внимавате на себе и никогаш не ја занемарувате моќта на привлечниот изглед. Но, и покрај тоа, понекогаш се прекорувате дека не се трудите да изгледате посекси. Престанете! Во многу случаи мажите се плашат да им пријдат на жени кои се премногу накитени, затоа што делуваат недостапно.

Жените кои премногу се обидуваат да бидат секси често оставаат и впечаток дека се очајни. Треба да изгледате негувано и женствено, а не провокативно.

Не се присилувајте да се облекувате и шминкате позаводливо, затоа што тоа нема да сте вие. Мажите сакаат жени кои се чувствуваат комфорно и секси во својата кожа. Поработете на вашата самодоверба, затоа што нема ништо посекси и попривлечно од самоуверена жена.

„Сите мажи се исти, сите се [негативен збор]“

Не, не се сите мажи исти. Генерализирањето секогаш води до погрешни заклучоци. Можеби досега не сте имале доволно среќа за да запознаете некој што ја заслужува вашата љубов, но тоа не значи дека не постои подобар.

Гледајте на секој човек како на одделна личност. Зошто да страда некој ваш сегашен обожавател само затоа што бившиот не знаел да ве цени и/или ја изневерил вашата доверба?

„Сите мажи сакаат само едно нешто – секс“

Никој нема да негира дека сите мажи сакаат секс, но тоа не е единственото нешто што го сакаат. Барем не сите мажи. Навистина, има мажи чија единствена цел е што побрзо да ве однесат в кревет, но тоа не важи за сите. Исто како жените, и мажите сакаат стабилна врска.

Не можете да си создавате одбивност кон мажите само затоа што сакаат секс, бидејќи тоа е во нивната природа. Не заборавајте дека вие ја имате моќта да кажете „не“ и ако забележите дека некој има само такви намери, веднаш можете да го подигнете знакот „Стоп!“.

„Сите добри мажи се зафатени“

Ако вашите заљубени пријателки постојано ви се фалат колку им е убаво во врска, а вашите сингл пријателки се жалат колку во денешно време е тешко да се најде вистински партнер, тогаш апсолутно логично е да извлечете заклучок дека сите добри мажи веќе се во врска.

Но, светот е голем и постојат многу луѓе кои вие не ги познавате. Не губете надеж. Тоа што досега не сте го пронашле мажот од соништата не значи дека тој веќе поминал покрај вас и дека е во нечија прегратка.