Кламидија – тивка сексуално пренослива болест
Почетна » Здравје » Заболувања » Кламидија – тивка сексуално пренослива болест

Кламидија – тивка сексуално пренослива болест

Кламидијата е една од најчестите бактериски сексуално преносливи болести (СПБ). Таа може да ги оштети женските репродуктивни органи и да доведе до неплодност ако не биде навремено лекувана. Најчесто оваа инфекција „тивко“, без никакви симптоми, му наштетува на здравјето и поради тоа брзо се шири меѓу сексуално активното население.

Натажена девојкаОколу 75% од жените кои имаат кламидија НЕ пројавуваат никакви симптоми

Што е кламидија?

Кламидијата е инфекција предизвикана од бактеријата Chlamydia trachomatis која најчесто се пренесува на два начина:

  • За време на сексуален однос. Кламидијата може да се пренесе при вагинален, орален или анален сексуален однос со инфициран партнер.
  • Од мајката на бебето за време на породување. Мајка инфицирана со кламидија може да му ја предаде инфекцијата на своето новороденче при вагинално породување.

Кламидијата може да ги зафати ректумот и уретрата, а кај жените и грлото на матката. Секоја сексуално активна личност може да се зарази со кламидија, но таа е најраспространета меѓу лицата кои немаат навршено 25 години. Колку поголем е бројот на сексуални партнери, толку поголем е ризикот од инфицирање со кламидија.

Симптоми

Повеќето заболени со кламидија имаат благи или немаат никакви симптоми. Поради тоа, многу е тешко без соодветни тестови да се процени дали една личност е инфицирана со кламидија или не. Всушност, околу 75% од инфицираните жени и 50% од мажите со кламидија не пројавуваат никакви симптоми. Кога симптомите се присутни, тие се појавуваат во период од 1-3 седмици по сексуалниот контакт со инфицираната личност.

Симптоми на кламидија кај жени

  • Абнормален вагинален исцедок кој може да има непријатна миризба;
  • Печење за време на мокрење;
  • Абнормално крварење меѓу менструалните периоди или по сексуален однос;
  • Болки при сексуален однос (диспареунија);
  • Болки за време на менструација;
  • Нерегуларно менструално крварење;
  • Абдоминална болка проследена со температура;
  • Чешање или печење во или околу вагината;
  • Ректален исцедок, болка или крварење од анусот.

Симптоми на кламидија кај мажи

  • Болно мокрење, т.е. чувство на печење за време на мокрење;
  • Мало количество на чист или матен исцедок од врвот на пенисот;
  • Печење, чешање и/или црвенило околу отворот на пенисот;
  • Болка и отеченост околу тестисите;
  • Ректален исцедок, болка или крварење од анусот.

Кламидијата се пренесува и при отсуство на симптоми. Лицето инфицирано од кламидија е носител на истата сè додека не биде излекувано.

Дијагностицирање

Кламидијата може да биде помешана со гонорејата поради сличноста на симптомите, а често овие две болести се присутни истовремено. Најчесто кламидијата се дијагностицира преку земање на брис од грлото на матката кај жените и од исцедокот од уретрата кај мажите, или пак, преку испитување на урината за присуство на бактеријата Chlamydia trachomatis.

Многу жени ПОГРЕШНО сметаат дека кламидијата може да биде дијагностицирана преку рутинскиот ПАП тест.

Лекување

Добрата вест е што по дијагностицирањето кламидијата лесно се лекува со антибиотици. Лекувањето е задолжително и кај двајцата партнери за да се спречи повторно предавање или ширење на болеста. Инфекцијата најчесто исчезнува 1-2 седмици по започнувањето на третманот, но ако симптомите се појават и по завршувањето на тој период, пациентот задолжително треба да се консултира со стручно лице. Многу е важно да се примат сите препишани антибиотици, иако инфицираната личност може да се чувствува подобро уште пред завршувањето на терапијата.

По примањето на антибиотиците, препорачливо е повторно да се направи тестирање за да се провери дали инфекцијата е излекувана. Сексуални односи не се препорачуваат сè додека и на двајцата партнери не им биде соопштено дека кај нив веќе не е присутна кламидија.

Компликации

Ако се лекува веднаш, кламидијата не предизвикува сериозни проблеми. Но, доколку се остави без никаков третман, може да предизвика несакани компликации.

  • Кај жените – карлична воспалителна болест. Доколку кламидијата се прошири, може да предизвика карлична воспалителна болест (Pelvic inflammatory disease – PID). PID е термин кој се користи за да опише инфекција на матката, јајцеводите и/или јајниците. Најчесто од PID страдаат јајцеводите кои можат да бидат оштетени или целосно блокирани. Тоа го отежнува или оневозможува процесот на зачнување и го зголемува ризикот од вонматерична бременост или предвремено породување кај трудниците. Покрај кламидијата, друг чест причинител на PID е гонорејата.
  • Кај новороденчињата – конјуктивитис и пневмонија. Мајката за време на вагинално породување може да му ја предаде инфекцијата на новороденчето. Кламидијата предадена за време на породување може да предизвика конјуктивитис (воспаление на мембраната на окото кај новороденчето) или пневмонија која може да биде опасна за неговиот живот. Овие две здравствени состојби кај новороденчето можат да бидат лекувани со антибиотици.
  • Кај мажите – епидидимитис. Доколку не се лекува, кламидијата може да предизвика епидидимитис кај мажите. Тоа е инфекција на епидидимисот, дел од репродуктивниот систем на мажите во кој се складира и созрева спермата откако ќе биде испуштена од тестисите.

Како можете да се заштитите од кламидија?

Едно е сигурно – заштитата од кламидија е далеку полесна од лекувањето од истата, па затоа:

  • Практикувајте безбеден секс. За да се заштитите од кламидија, користете кондом. Латекс кондомите се добра заштита против оваа СПБ.
  • Ограничете го бројот на сексуални партнери. Со секој нов сексуален партнер вие се изложувате себеси на сите инфекции кои тој и претходните негови партнерки ги имале.
  • Тестирајте се. Најдобар начин да се заштитите од кламидија е да се тестирате за СПБ и вие и новиот партнер пред да имате сексуален однос. Исто така, многу е важно секоја бремена жена или жена која планира да зачне да се тестира не само за кламидија, туку и за другите најчести СПБ.

Анкета

Анкета
Дали редовно си правите самопреглед на дојките?
  • 25%
  • 75%
Се испраќа...

(Вкупно: 571 гласа)

Цитат

Не патуваме за да избегаме од животот, туку за животот да не ни избега нам.

Анонимен

Виц

Мажите со брада во 1819 година:

- Ќе ја убијам оваа мечка со голи раце!!!

Мажите со брада во 2019 година:

- Органски ли е овој крем за раце?