Босанскиот град Какањ започна тренд на хуманост. На почетокот на месецов, Балканот го обиколи веста дека по барање на граѓаните, Какањ се откажува од новогодишната прослава и парите ги донира за лекување на 7-годишно момче.
Српската јавност започна масовна петиција „Да бидеме хумани – Нова година за Нов живот“ и досега повеќе општини одговорија позитивно на барањата да се каже „НЕ“ на прославите и да се пренаменат парите за хуманитарни цели.
И во Македонија започнаа иницијативи да станеме дел од бранот на хуманоста. Градоначалникот на Велес денес објави дека нема да се организира празнична прослава за дочекот на Новата година и дека парите ќе бидат донирани.
„Локалната самоуправа оваа година нема да организира прослава за одбележување на Новата Година. Одлучено е планираните средства да бидат донирани во хуманитарни цели.“
„За таа потреба од Центарот за социјални работи побарани се информации за оние семејства кои имаат најголема потреба од помош во пресрет на претстојните празници“ – пишува во соопштението на сајтот на општината.
Онлајн анкетата на нашиот сајт покажува дека има многу мал интерес за посета на прославите на плоштади.
Со оглед на тоа што само 1% од над 3.000 лица избрале дека ќе ја дочекаат Нова година на плоштад, градоначалниците треба посериозно да се замислат за ваков хуман потег.
