Драгана Рајкова уште од мали нозе ја негува љубовта кон пишаниот збор. Девојчето, кое потекнува од Струмица и живее во Валандово, на 10-годишна возраст ја издаде својата прва книга.
Станува збор за стихозбирката насловена „Спомени од моето детство“, која содржи 44 песнички на Драгана. Првата песна таа ја напишала кога имала само
„Првата песничка ја напишав на 7-годишна возраст и оттогаш почнав да пишувам и создавам, да учествувам на разни литературни конкурси. Така, песничките една по една се собираа и кога видов дека имам многу песнички, се одлучив да бидат собрани во едно детско книжевно дело коешто се надевам ќе биде интересно за секое дете затоа што оваа е стихозбирка со сликовница, секоја песничка има своја илустрација за да биде интересна за детето читател“ – изјави креативното девојче за Femina.mk.
Слатката писателка вели дека инспирацијата за издавањето на книгата се појавила од моментите кога навечер нејзините родители ѝ читале приказни пред да заспие.
„Како мала, пред да заспијам, моите родители ми читаа книги и јас поубаво заспивав. Mислам така и ми се појави желбата кон книгата и пишаниот збор, а на 5 години веќе ми се појави желба и јас да напишам книга која родителите на малите дечиња ќе им ја читаат за да заспиваат поубаво“ – дополни Драгана.
На радоста ѝ немало крај кога Драгана за првпат го држела во рацетe своето литературно дело. Tаа вели дека со доволно труд, секој сон може да стане реалност.
„Мислев дека е сон, но мојот сон стана реалност. Ја држев и листев книгата, срцето ми скокаше од радост, бев пресреќна и сите околу мене. Со моето семејство се радувавме на мојот успех. Јас сакам да пишувам и да создавам, тоа едноставно излегува од мене преку моливчето во мојата тетратка за песнички. Како девојче на 10-годишна возраст можам да кажам дека секој сон станува реалност доколку се потрудиш“ - вели Драгана.
Драгана има учествувано на многу литературни конкурси каде има освоено многу награди и пофалници.
Фотографиите се објавени со дозвола од родител.
