Ник Вујичиќ, инспиративниот маж роден без раце и нозе, стана татко на четири деца.
35-годишниот Австралиец со српско потекло доби близначки, а радосната вест ја сподели со своите фанови преку фотографии од болницата.
На нив, Ник е со сопругата Канае Мијахара и двете новородени бебенца.
„Нашиот идентичен двоен благослов од нашиот милостив и семоќен Бог!“ - напиша тој и дополна дека и мајката и бебињата се во добра здравствена состојба.
Во август 2011 година Ник ја побара Канае за жена, на 10 февруари 2012 нивната љубов беше крунисана со брак. Покрај близначките Оливија Мел и Ел Лорел, тие имаат две синчиња.
Нивното прво синче се роди во февруари 2013 година, а второто во 2015 година.
За оние кои не се запознати со неговата приказна, тој е роден со редок деформитет (тетра-амелија синдром), односно роден е без екстремитети. Вообичаено лицата со ваков деформитет не се во можност да ги извршуваат наједноставните секојдневни активности, но тој досега успеал да направи многу повеќе отколку што многумина направиле во текот на цел живот. Со огромна смелост тој сурфа, плива, игра голф, патува низ различни држави и мотивира милиони луѓе да си го подобрат животот.
